काठमाडौं ।
नेपाली कांग्रेसको १५औँ महाधिवेशनको मिति टुंगो लगाउन नेताहरूबीच भइरहेको गृहकार्य अन्तिम चरणमा पुगेको छ। आगामी पुस २६ देखि २९ गते महाधिवेशन गर्ने सहमति बनेको र भोलि बस्ने केन्द्रीय समिति बैठकबाट यही मिति औपचारिक रूपमा पारित हुने एक नेताले जानकारी दिएका छन्।
आइतबार कार्यवाहक सभापति पूर्णबहादुर खड्काको नेतृत्वमा महामन्त्रीद्वय गगन थापा र विश्वप्रकाश शर्मा, नेता रमेश लेखक, तथा प्रचार विभाग प्रमुख मीन विश्वकर्मा सम्मिलित बैठकमा महाधिवेशन मितिसम्बन्धी प्रस्तावमा सहमति जुटाइएको बताइएको छ।
सोमबार बस्ने केन्द्रीय समिति बैठकमा कार्यतालिकासम्बन्धी प्रस्ताव कार्यवाहक सभापति खड्काले नै पेश गर्नेछन्। प्रस्ताव छलफलका लागि नभई प्रत्यक्ष निर्णयार्थ प्रस्तुत गरिनेछ।
यसअघि महामन्त्री गगन थापा र सहमहामन्त्री महेन्द्र यादवले अलग–अलग रूपमा पेस गरेको महाधिवेशनसम्बन्धी प्रस्तावमा भने कुनै छलफल नहुने भएको छ। आइतबार बसेको संस्थापन पक्षका केन्द्रीय सदस्यहरूको भेलाले यादवको प्रस्तावलाई बहुमतले पारित गराउने रणनीति तय गरेको थियो।
कांग्रेसको २८ असोजदेखि सुरु गरिएको केन्द्रीय समिति बैठक पटक–पटक स्थगित हुँदै आएकोमा, अब सोमबार बस्ने बैठक नै महाधिवेशन मिति टुंगो लगाउने निर्णायक बैठक मानिएको छ।
प्रतिक्रिया
सम्बन्धित खवर
