ताप्लेजुङ/काठमाडौँ, मंसिर ।
ताप्लेजुङको ओलाङचुङगोलास्थित मूल भन्सार कार्यालयमा कर्मचारी नियुक्ति गर्न माग गर्दै ताप्लेजुङका युवाहरूले काठमाडौँको त्रिपुरेश्वरस्थित मूल भन्सार कार्यालयमा धर्ना सुरु गरेका छन्। मूल भन्सार कार्यालयले गत मंसिर २ गतेभित्रै कर्मचारी पठाइने आश्वासन दिए पनि हालसम्म कर्मचारी नपठाइएको भन्दै आजदेखि धर्ना कार्यक्रम थालिएको धर्नामा बसेका दिनेश सिग्देलले जानकारी दिए।

सिग्देलका अनुसार भन्सारमा पठाइने भनिएका कर्मचारीहरूलाई अन्यत्र सरुवा गरिएकोप्रति युवाहरूले कडा आपत्ति प्रकट गरेका छन्। “आज म धर्नामा बसेको छु, भोलिदेखि क्रमैसँग अन्य साथीहरू बस्नेछौँ। हामी करिब १५ जनाको टोली ताप्लेजुङबाट नै यसका लागि काठमाडौँ आएका हौँ,” उनले भने।

बहुप्रतिक्षित टिप्टला नाका सञ्चालनका लागि ओलाङचुङगोला भन्सार पूर्ण रूपमा क्रियाशील हुनुपर्ने र त्यसका लागि तत्काल कर्मचारी नियुक्ति आवश्यक रहेको युवाहरूको भनाइ छ। उनीहरूले बारम्बार ध्यानाकर्षण गराए पनि माग बेवास्ता गर्दै मूल भन्सार कार्यालयले व्यवस्थापनमा आलटाल गरेको आरोप लगाएका छन्।

युवाहरूले माग पूरा नभएमा आगामी दिनमा सशक्त आन्दोलनात्मक कदम चाल्ने चेतावनी समेत दिएका छन्।