ताप्लेजुङ, मंसिर १४ गते ।
ताप्लेजुङको फुङलिङ नगरपालिका–३ केनेमका आगलागी पीडित क्षदारे शेर्पालाई नेपाल शेर्पा सङ्घ जिल्ला समन्वय समिति ताप्लेजुङले राहत सामग्री प्रदान गरेको छ। विद्युत् सर्टका कारण शुक्रबार राति शेर्पाको घरमा अचानक आगलागी हुँदा घर जलेर पूर्ण रूपमा नष्ट भएको थियो।

घटनापछि शनिबार जिल्ला समन्वय समितिका पदाधिकारीहरू पीडितको घरस्थलमै पुगेका थिए। समितिले चामल, कपडा, डसना, सिरक, त्रिपाललगायत करिब २० हजार रुपैयाँ बराबरको राहत सामग्री हस्तान्तरण गरेको समितिका अध्यक्ष दावा शेर्पाले बताए।

अध्यक्ष शेर्पाका अनुसार पीडित परिवारलाई तात्कालिक सहयोग स्वरूप राहत उपलब्ध गराइएको हो। आगलागीबाट अनुमानित ७ लाख २० हजार रुपैयाँ बराबरको क्षति पुगेको छिमेकी लाक्चुङ शेर्पाले जानकारी दिएका छन्।

स्थानीयवासीले शीघ्र पुनःस्थापनाका लागि थप सहयोग आवश्यक रहेको जनाएका छन्।