ताप्लेजुङ — आगामी फागुन २१ गते हुने प्रतिनिधिसभा निर्वाचन र शान्ति–सुरक्षाका विषयमा सीमावर्ती तीन जिल्लाका प्रमुख जिल्ला अधिकारीसहितका सुरक्षा निकायका प्रमुखबीच गुफापोखरीमा समन्वय बैठक सम्पन्न भएको छ। ताप्लेजुङ, तेह्रथुम र संखुवासभाका अधिकारी सहभागी भएको बैठकमा निर्वाचनलाई भयरहित, स्वतन्त्र र निष्पक्ष बनाउन आवश्यक सुरक्षा रणनीतिमाथि विस्तृत छलफल गरिएको थियो।

ताप्लेजुङका प्रमुख जिल्ला अधिकारी शिवराज सेढाईका अनुसार निर्वाचन सुरक्षा योजनासँगै जनजी आन्दोलनका बेला फरार कैदी, हतियार नियन्त्रण तथा सूचना आदान–प्रदानजस्ता विषयमा पनि गहन छलफल गरिएको छ। बैठकबाट देखिने गरी परिणाम आउने अपेक्षा राखिएको उनले बताए।

चीनसँग सिमाना जोडिएका ताप्लेजुङ र संखुवासभा तथा तराईसँग सिमाना जोडिएको तेह्रथुमको संगमस्थल गुफापोखरीमा बसेको कार्यक्रममा सेना, सशस्त्र प्रहरी, नेपाल प्रहरी र प्रशासन प्रतिनिधि गरी तीनै जिल्लाका अधिकारीहरूको सहभागीता थियो।