ताप्लेजुङ, मंसिर ११ गते । धरान उपमहानगरपालिकाका मेयर तथा श्रम संस्कृति पार्टीका अध्यक्ष हर्कराज ‘हर्क’ साम्पाङले आफू प्रधानमन्त्री बन्ने लक्ष्यसहित नै पार्टी स्थापना गरेको दाबी गरेका छन्।

श्रम संस्कृति पार्टीको संगठन घोषणा कार्यक्रममा सहभागी हुन ताप्लेजुङ आएका साम्पाङले भने,
“मैले अरुलाई प्रधानमन्त्री बनाउन पार्टी खोलेको होइन, म आफैँ प्रधानमन्त्री बन्ने हो।”

साम्पाङले आफूमा प्रधानमन्त्री बन्ने दम, क्षमता र आत्मविश्वास रहेको उल्लेख गर्दै वर्तमान राजनीतिक नेतृत्व देश डुविरहेको बेला जिम्मेवारी लिनबाट भागिरहेको आरोप लगाए।
उनले भने, “देश जल्दैछ, ढल्दैछ, यस्तो अवस्थामा ‘म जान्छु’ भन्न सक्ने मान्छे म आफैँ हुँ।”

साम्पाङले आफू र आफ्नो पार्टीले एक पैसा पनि भ्रष्टाचार नगर्ने दाबी गर्दै वर्तमान सरकारलाई ‘टालाटुली’ आरोप लगाए।
उनका अनुसार देशमा परिवर्तन ल्याउन नेपाली जनताले श्रम संस्कृति पार्टीलाई बहुमत दिए मात्र सम्भव हुन्छ।
यदि बहुमत पाएर पनि परिवर्तन गर्न नसके देशै छोड्ने घोषणा समेत उनले गरे।

श्रम संस्कृति पार्टीलाई निर्वाचन आयोगले आधिकारिक दल दर्ता प्रमाणपत्र प्रदान गरिसकेको छ।
अध्यक्ष साम्पाङ हाल देशव्यापी रूपमा संगठन विस्तारमा व्यस्त छन्।

यसबाहेक पाँचथर र इलाम जिल्लामा पार्टी संरचना यसअघि नै गठन भइसकेको आयोजकहरूले जनाएका छन्।