ताप्लेजुङ। ताप्लेजुङको मिक्वाखोला–४ स्थित तेम्बा बजारमा मंसिर २ गते मध्यराति लागेको आगलागीका पीडितलाई नेपाली काँग्रेस जिल्ला कार्यसमिति ताप्लेजुङ र मिक्वाखोला गाउँपालिका समितिले आर्थिक सहयोग गरेको छ।

नेपाली काँग्रेसका जिल्ला सभापति गजेन्द्र प्रसाद तुम्याहाङका अनुसार, प्रत्येक पीडित परिवारलाई नगद ११ हजार ५०० रुपैयाँ प्रदान गरिएको छ। दोश्रो फङ्फङ्देन झरना सांस्कृतिक तथा पर्यटन मेलामा सहभागी हुन आएका सभापति र अन्य पदाधिकारीहरूले राहत स्वरुप जम्मा ६९ हजार रुपैयाँ पीडितहरूलाई हस्तान्तरण गरेका थिए।

आगलागीमा इन्द्रकुमार लिम्बू, राजकुमार लिम्बू, अनिल लिम्बू र विष्णुप्रसाद लिम्बूका घर पूर्ण रूपमा जलेर नष्ट भएका थिए। भाडामा बस्दै आएका पासाङ फुटी शेर्पा र दोर्ची शेर्पा पनि पीडितमा परेका छन्। यस आगलागीबाट करिब १ करोड १८ लाख रुपैयाँभन्दा बढीको क्षति भएको बताइएको छ।