ताप्लेजुङ, २०८२ मंसिर ११।
“स्वास्थ्यका लागि खेलकुद, राष्ट्रका लागि खेलकुद” भन्ने नारासहित ताप्लेजुङमा आयोजना हुन लागेको दोस्रो साईधुङ्गे माङ्गेना कप पुरुष फुटबल प्रतियोगिता–२०८२ को तयारी तीव्र गतिमा अगाडि बढिरहेको छ।

प्रतियोगिता सफलतापूर्वक सम्पन्न गर्न आवश्यक व्यवस्थापन एवं आयोजकीय कार्यलाई सहज बनाउन कोशी प्रदेश सरकारका उद्योग, कृषि तथा सहकारी मन्त्रालयका माननीय मन्त्री खगेन सिंह हङ्गामले आर्थिक सहयोग प्रदान गर्नु भएको छ।

कार्यक्रमको तयारीमा जुटिरहेका सामाजिक रहबर मूल संचालन समिति, साईधुङ्गे माङ्गेना, मेरिङ्देन गाउँपालिका–५, ताप्लेजुङलाई मन्त्री हङ्गामले रु १,००,००० (अक्षरेपी एक लाख रुपैयाँ) सहयोग स्वरूप हस्तान्तरण गर्नु भएको आयोजकले जनाएको छ। आर्थिक योगदानले प्रतियोगिताको प्राविधिक, व्यवस्थापकीय तथा पुरस्कार व्यवस्थामा महत्वपूर्ण सहयोग पुग्ने छ।

मन्त्री हङ्गामले खेलकुदमा युवाहरूलाई अनुशासन, नेतृत्व, सहकार्य र स्वास्थ्यप्रति सचेत बनाउने माध्यम भएकाले यस्ता प्रतियोगितामा राज्य–समाज दुवैले सहयोग गर्नुपर्ने बताउँदै प्रतियोगिता सफल रहोस् भन्ने शुभकामना व्यक्त गर्नुभयो। उहाँले ग्रामीण तहसम्म खेलकुद कार्यक्रम विस्तार हुनु प्रदेश सरकारको प्राथमिकतामा रहेको उल्लेख गर्दै युवा संभावनाहरूलाई उजागर गर्न यस्ता आयोजना अत्यन्त महत्त्वपूर्ण हुने धारणा राख्नु भयो।

आयोजक समितिले मन्त्री हङ्गामप्रति आभार व्यक्त गर्दै खेलकुदमैत्री वातावरण निर्माणमा प्रदेश सरकारको सक्रियताको प्रशंसा गरेको छ।

समितिका अनुसार यस वर्षको प्रतियोगिता अझ आकर्षक, प्रतिस्पर्धात्मक र व्यवस्थित बनाउने तयारी भइरहेको छ। प्रतियोगितामा जिल्लाका विभिन्न स्थानीय क्लबसँगै छिमेकी क्षेत्रका टोल–टिमले समेत सहभागिता जनाउने अपेक्षा गरिएको छ।

प्रतियोगिताले स्थानीय पर्यटन प्रवर्द्धन, सामुदायिक एकता तथा युवक–युवतीमा खेलप्रति रुचि र उत्साह बढाउन महत्वपूर्ण भूमिका खेल्ने आयोजकले विश्वास व्यक्त गरेको छ।

खेल मङ्सिर १३ देखि १८ गतेसम्म संचालन हुने छ। प्रतियोगिताको बिजेता नगद रु. १ लाख ५० हजार, उपबिजेताले नगद रु. १ लाख प्राप्त गर्ने आयोजकले जानकारी दिएको छ।खेल मेरिङ्देन गाउँपालिका -५ स्थित सुन्सोलोकको खेल मैदानमा हुनेछ।