-तरुण भारती
ताप्लेजुङ,मंसिर १३। मौलिक तथा स्थानीय खानाका परिकार, सांगीतिक प्रस्तुति र स्थानीय संस्कृतिको प्रचार–प्रसार गर्ने उद्देश्यले ताप्लेजुङमा ‘प्रथम बनभोज तथा भेटघाट कार्यक्रम–२०८२’ हुने भएको छ। सुकेटारमा मंसिर १३ गतेका दिन आयोजना हुने यस विशेष कार्यक्रमले जिल्लाका विभिन्न ठाउँबाट सहभागीलाई एक ठाउँमा ल्याउने लक्ष्य राखिएको छ।

कार्यक्रमका आकर्षणमा मौलिक तथा स्थानीय स्वादका परिकार, स्थानीय कलाकारहरूको प्रस्तुति, सांगीतिक कार्यक्रम, साथै स्थानीय उत्पादनहरूको प्रदर्शनी समावेश गरिएको आयोजकले जानकारी दिएका छन्।
प्रवेश शुल्क रु. ८०० तोकिएको छ।

कार्यक्रमको संयोजन हिमाली ग्रामीण विकास, ताप्लेजुङले गरिरहेको छ। स्थानीय संस्कृतिलाई संरक्षण गर्दै समुदायबीच भेटघाट, साझेदारी र मनोरञ्जनको माध्यम बनाइ यो कार्यक्रम आयोजना गरिएको संयोजकले बताए।

स्थानीय अगुवादेखि युवासम्मको उत्साहजनक सहभागिता अपेक्षित रहेको कार्यक्रम आयोजकले जनाएको छ। सुकेटारकै रमणीय वातावरणमा हुन लागेको यो बनभोज कार्यक्रम जिल्लावासीका लागि नयाँ अनुभव हुने अपेक्षा गरिएको छ।