मंसिर ११ गते, ताप्लेजुङ । धरान उपमहानगरपालिका मेयर हर्क साम्पाङ राईको उपस्थितिमा ‘श्रम संस्कृति पार्टी’ले फुङलिङमा संगठन विस्तार कार्यक्रम आयोजना गर्ने भएको छ। फुङलिङ नगरपालिका–४ तोक्मेडाँडास्थित अस्थायी बसपार्कमा बिहिबार दिउँसो १२ बजेदेखि स्टेज कार्यक्रम सञ्चालन हुने तयारी गरिएको छ।

जिल्ला संयोजक निमतेन्जी शेर्पाका अनुसार मेयर राई बिहिबार विहान साढे ६ बजे गोपेटारबाट ताप्लेजुङतर्फ प्रस्थान गर्नेछन्। “आएलगत्तै खाना–पानी भएपछि कार्यक्रम सुरु गर्ने योजना छ,” उनले बताए। मेयर राईसहित १०–१५ सदस्यीय टोली ताप्लेजुङ आउने छ ।

हेलिप्याड गेटमा स्वागत कार्यक्रम तय गरिएको र विरेन्द्रचोकदेखि कार्यक्रमस्थलसम्म र्याली निकालिने संयोजक शेर्पाले जानकारी दिए। कार्यक्रमको मुख्य आकर्षण भनेको सपथ ग्रहण तथा पार्टी प्रवेश कार्यक्रम रहनेछ। स्टेजमा सांस्कृतिक कार्यक्रम भने समावेश गरिएको छैन।

पार्टी प्रवेशमा को–को सहभागी हुनेछन् भन्ने जिज्ञासामा संयोजक शेर्पाले, “थुप्रैले सम्पर्क गरिरहेका छन्, परिचय कार्यक्रमस्थलमै सार्वजनिक हुनेछ,” भने। उनका अनुसार गाउँ–गाउँबाट स्वस्फूर्त रुपमा सहभागी आउनेहरु बाहेक, पार्टीले यातायात वा अन्य कुनै शिर्षकमा खर्च व्यवस्थापन गरेको छैन।

आगामी कार्यक्रमका तयारीस्वरूप बुधबार कार्यक्रमस्थल वरपर सरसफाइ गरिएको छ। गत मंसिर ५ गते शेर्पाको संयोजकत्वमा २२ सदस्यीय तदर्थ समिति गठन गरिएको थियो।