ताप्लेजुङ, पुस १ ।
पुसेमेला २०८२ को अवसरमा ताप्लेजुङको दोभान बजारमा अन्तर्राष्ट्रिय आमन्त्रण पुरुष भलिबल प्रतियोगिता आयोजना गरिने भएको छ। पुसेमेला सञ्चालन समिति र दोभान स्पोर्टिङ क्लबको संयुक्त आयोजनामा हुने प्रतियोगिता पुस १ गतेदेखि ५ गतेसम्म सञ्चालन हुने सचिव गणेश कार्की डोलीले जानकारी दिनुभयो।

पुसेमेला सञ्चालन समितिका अध्यक्ष हेम चोङवाङका अनुसार विजेता टिमले नगद ३ लाख रुपैयाँ, उपविजेताले १ लाख ७५ हजार रुपैयाँ सहित ट्रफी, मेडल र प्रमाणपत्र प्राप्त गर्नेछन्। साथै, सेमी–फाइनलमा पुग्ने दुई टिमलाई प्रति टिम ५० हजार रुपैयाँ सान्त्वना पुरस्कार प्रदान गरिनेछ।

व्यक्तिगत तर्फका उत्कृष्ट खेलाडीहरूलाई पनि आकर्षक पुरस्कार राखिएको छ।

उत्कृष्ट सर्भर

उत्कृष्ट डिफेन्डर

उत्कृष्ट ब्लकर

उत्कृष्ट सेटर

उत्कृष्ट प्रशिक्षक

उदयमान खेलाडी

यी सबै विधाका विजेतालाई जनही ५ हजार रुपैयाँ दिइने समितिले जनाएको छ। प्रतियोगिताको सर्वोत्कृष्ट खेलाडी (MVP) ले ७ हजार रुपैयाँ, र प्रत्येक खेलका म्यान अफ द म्याच ले १ हजार ५ सय रुपैयाँ प्राप्त गर्नेछन्।

सहभागी टिमलाई एकतर्फी बस भाडा उपलब्ध गराइनेछ। खेलकुदमार्फत कृषि तथा पर्यटन प्रवर्द्धन गर्ने, दोभान क्षेत्रका प्राकृतिक सम्पदा र स्थानीय बाली तथा उत्पादनको पहिचान बढाउने, साथै नयाँ प्रतिभाहरूको विकासमा टेवा पुर्‍याउने लक्ष्यसहित प्रतियोगिता आयोजना गरिएको समितिले जनाएको छ।

मेरिङदेन गाउँपालिका र आठराई–त्रिवेणी गाउँपालिकाको संगमस्थल दोभान बजारमा लाग्ने पुसेमेला यस वर्ष ५१ औँ वर्ष पुगेको छ।
मेला क्षेत्रीय सांस्कृतिक पहिचान, व्यापार विस्तार तथा खेलकुद विकासको महत्वपूर्ण केन्द्र बन्दै आएको आयोजक समितिको भनाइ छ।