ताप्लेजुङ । विपत्तिको पीडा भूगोलले छेक्दैन, मानवीय संवेदनाले सबैलाई जोड्छ। रसुवालगायतका जिल्लामा आएको विनाशकारी बाढीबाट प्रभावित नागरिकको पीडामा ताप्लेजुङका निजी तथा आवासीय विद्यालयहरू पनि सहयात्री बनेका छन्।

निजी तथा आवासीय विद्यालय अर्गनाइजेसन नेपाल (प्याब्सन) ताप्लेजुङमा आबद्ध जिल्लाका १३ विद्यालयले बाढीपीडितको राहतका लागि ६ लाख ५१ हजारभन्दा बढी रुपैयाँ सहयोग गरेका छन्। विद्यालय, शिक्षक, विद्यार्थी तथा अभिभावकको सामाजिक उत्तरदायित्वलाई आत्मसात् गर्दै संकलन गरिएको उक्त रकम प्याब्सन राहत कोषमार्फत पीडितसम्म पुर्‍याउने पहल गरिएको हो।

प्याब्सन ताप्लेजुङले सार्वजनिक गरेको विवरणअनुसार लिटल बुद्ध बोर्डिङ स्कुल, कञ्चनजङ्घा बोर्डिङ स्कुल, कञ्चन एकेडेमी, हाङ्देवा पाथीभरा क्यू लर्निङ स्कुल, मेची सेन्टमेरिज बोर्डिङ स्कुल, मेची होराइजन बोर्डिङ स्कुल, अक्सफोर्ड बोर्डिङ स्कुल, सुरटी मन्टेश्वरी स्कुल, तमोर इङ्लिस स्कुल, ताप्लेजुङ सिद्धार्थ एकेडेमी, ताप्लेजुङ बुद्ध बोर्डिङ स्कुल, गुरुकुल एकेडेमी र पाथीभरा ब्राइट फ्युचर एकेडेमीले राहतका लागि आर्थिक सहयोग गरेका हुन्।

सहयोग रकममा विद्यालयअनुसार फरक–फरक योगदान रहेको छ। केही विद्यालयले एक लाख रुपैयाँभन्दा बढी सहयोग गरेका छन् भने अन्य विद्यालयले पनि आफ्नो क्षमताअनुसार उल्लेख्य रकम प्रदान गरेका छन्।

‘पढाउने मात्र होइन, पीडामा साथ दिने संस्कार पनि सिकाउने’

शिक्षा भनेको केवल किताब र कक्षाकोठामा सीमित विषय होइन। संकटका बेला दुःखमा परेकालाई सहयोग गर्नु, मानवीय संवेदना देखाउनु र समाजप्रतिको जिम्मेवारी पूरा गर्नु पनि शिक्षाकै महत्वपूर्ण हिस्सा हो।

ताप्लेजुङका निजी विद्यालयहरूले बाढीपीडितका लागि गरेको यो सहयोगले ‘विद्यालयले पढाउने मात्र होइन, समाजप्रतिको जिम्मेवारी पनि बहन गर्छ’ भन्ने सकारात्मक सन्देश दिएको छ।

प्याब्सन ताप्लेजुङका अध्यक्ष देवराज गुरुङका अनुसार सहयोग रकम तथा सहयोगी विद्यालयहरूको विवरण प्याब्सन केन्द्रीय कार्यसमितिलाई जानकारी गराइएको छ।

विपत्तिको समयमा गरिएको यो सहयोग रकमभन्दा पनि ठूलो मानवीय एकताको प्रतीक बनेको छ। घरबार, सम्पत्ति र आफन्त गुमाएर पीडामा रहेका बाढीपीडितका लागि ताप्लेजुङका विद्यालयहरूले पठाएको यो साथले राहतसँगै ‘तपाईंहरू एक्लै हुनुहुन्न’ भन्ने भरोसा पनि दिएको छ।