ताप्लेजुङ, मंसिर ८ ।
मिक्वाखोला गाउँपालिका–४ साँवाको तेम्बा बजारमा दोस्रो फङ्फङ्देन झरना सांस्कृतिक तथा पर्यटन मेला आइतबारदेखि सुरु भएको छ। फङ्फुङगे झरनासहित स्थानीय पर्यटन क्षेत्रहरूको प्रवर्द्धन गर्ने उद्देश्यले फङ्फङ्देन झरना पर्यटन विकास समिति मूल आयोजक रहनुका साथ मेला मंसिर ११ गतेसम्म सञ्चालन हुने छ।

मेलाको उद्घाटन कोशी प्रदेशका उद्योग, कृषि तथा सहकारी मन्त्री खगेनसिं हाङ्गामले गर्नुभएको हो। उद्घाटन समारोहमा याःलाङ (धान नाच), केःलाङ (च्यब्रुङ नाच) र झाकी नाच गरिँदा मेलास्थल उत्साहमय बनेको थियो।

यस पटक मेलामा अन्तर क्लबस्तरीय आमन्त्रित पुरुष फुटबल प्रतियोगिता, सांस्कृतिक कार्यक्रम, लघु उद्यम, कृषि तथा परम्परागत उत्पादनहरूको प्रदर्शन गरी विविधता समेटिएको छ।
समितिका कार्यवाहक अध्यक्ष नुपु शेर्पाका अनुसार फुटबल प्रतियोगिता सोमबारदेखि सुरु हुँदैछ। विजेतालाई ३ लाख २ हजार ८२ रुपैयाँ बराबरको अलैँची र उपविजेतालाई १ लाख ५२ हजार ८२ रुपैयाँ बराबरको अलैँची प्रदान गरिनेछ। फाइनलको दिन बजारभाउअनुसार अलैँची तौलेर पुरस्कार वितरण गरिने आयोजना समितिको योजना छ। अलैँची प्रवर्द्धन नै पुरस्कारमा अलैँची राख्नुुको मुख्य उद्देश्य रहेको अध्यक्ष शेर्पाले बताए।

यसैबीच, मंसिर १० गते राष्ट्रिय तथा स्थानीय कलाकारसहित वृहत् सांगीतिक कार्यक्रम आयोजना हुने भएको छ। मेलाका गतिविधि सञ्चालन तथा व्यवस्थापनका लागि झन्डै साढे १९ लाख रुपैयाँ खर्च हुने अनुमान आर्थिक व्यवस्थापन उपसमितिका संयोजक तथा कोषाध्यक्ष सुकबहादुर साँवा लिम्बूले जानकारी दिए।

फुङ्फुङगे झरनासहित मिक्वाखोला क्षेत्रमा रहेका पर्यटन स्थलहरूको राष्ट्रिय चिनारी बढाउने, आन्तरिक–बाह्य पर्यटक भित्र्याउने र स्थानीय बासिन्दाको आय–आर्जनमा वृद्धि गर्ने लक्ष्यसहित मेलालाई निरन्तरता दिइँदै आएको आयोजक समितिले जनाएको छ।