ताप्लेजुङ, मंसिर ८ ।
फुङलिङ नगरपालिकामा मंसिर १३ देखि २० गतेसम्म सञ्चालन हुने ‘कञ्चनजंघा सेसेलुङ महिला गोल्डकप’ फुटबल प्रतियोगिताको खेल तालिका सार्वजनिक गरिएको छ। यस वर्ष पहिलोपटक महिला फुटबललाई प्राथमिकताका साथ समेटिएकाले प्रतियोगिता प्रति उत्साह थपिएको आयोजकले जनाएको छ।
आठ टिमको सहभागीता रहने प्रतियोगितामा मिक्वाखोला गाउँपालिका भने सहभागी नहुने जानकारी आयोजकले दिएको छ। खेलहरू दिउँसो १:३० बजेदेखि सञ्चालन हुने तय भएको छ भने मंसिर १९ गते विशेष सांस्कृतिक कार्यक्रम समेत प्रस्तुति गरिने संयोजक चन्द्र थेबेले बताए।
संयोजक थेबेका अनुसार अघिल्ला वर्षहरूमा पुरुष फुटबल मात्र हुँदै आएको भए पनि, महिला फुटबलको बढ्दो माग र सहभागितालाई ध्यानमा राख्दै यस वर्षदेखि महिला गोल्डकपको सुरुआत गरिएको हो। आयोजक कञ्चनजंघा यूवा क्लब र ङा–वोरक सजम्बोले आगामी संस्करणहरूमा प्रतियोगिताको स्तर अझ उकास्ने तयारीसमेत गरिरहेका छन्।
प्रतियोगिता श्री भानु जन माध्यमिक विद्यालयको खेल मैदानमा सम्पन्न हुनेछ।
चासोक तङ्नाम पर्वको अवसर पारेर आयोजना गरिएको यो प्रतियोगितामा आर्थिक सहयोग गर्ने क्रम पनि सुरु भइसकेको छ। आयोजकले ‘चासोक तङ्नाम सञ्चालन समिति २०८२’को फेसबुक पेजमार्फत सहयोगदाता, तयारी अवस्था र अन्य सूचना नियमित रूपमा सार्वजनिक गर्दै आएको छ।
यसैबीच, प्रतियोगिताको प्रत्यक्ष प्रसारण गोलनेपाल डट कमबाट हुने भएकाले जिल्लाभित्र–बाहिरका खेलप्रेमीले खेलहरू सहज रूपमा हेर्न सक्नेछन्।







